Rimis e pensadinis in tumiezzin
I TIMPS E LIS VIODUDIS
Indice
1. Al ven carnevâl
2. Cjargne cres!
3. Legrie d'invier
4. Neveade dal prin di marz 2001
5. A corin lis stagjòns
6. D'invièr dal Zoncolàn
7. Versione scaricabile
1
AL VEN CARNEVÂL
Carnevâl da sestu stât
al è un pièz che no ti iodìn
scjafoât da modernitât
par agns e agns cidìn cidìn.
Ma chest an
ti ricjatìn
lêgri san
plen di morbìn.
Cu la mùsiche ch’à sune
e la sbìsie di balâ
i coriandui ta sachete
e il gust di mateâ.
2
CJARGNE CRES!
Cjargne, montagne dal Friûl,
biele ma spes bandonade, cres.
Cres par podei vivi.
No plui rivalitâz di paisuz,
no plui frignamenz cun Romis e cun Triescj;
ma une unitât par podê cressi
e sielgi cemût cressi.
3
LEGRIE
D'INVIER
Tal blanc da nèif
da mont ben soreglàde
une viste lêgre
a mi è capitàde.
A son i sciadôrs
di tancj colôrs
che jù a vègnin zigzagànt
cun slàlom stret o pur gjgànt.
Come coriàndui
su pài linzûi
di un carnevâl
che a nol ven plûi.
4
NEVEADE DAL PRIN DI MARZ 2001
Il cîl al è nulât e cidinute
la neif a ven jù fissute.
A ven sui prâz e su pa strade, sute,
sui tez das cjasis e das màchinis si intasse dute.
Dut al è pûr e blanc, dome cualchi talpinadute,
ma di lûs a 'nd' è ancjmò pocjute.
Lis nùvulis si vierzin, a son un veladin
e a fasin trasparî dal cîl il celestin.
Di colp un grant splendôr,
al è il sorêli che a dut a i dà colôr.
La neif sui cops a pâr une coltrute,
morbide cjalde e a somê ancjmò sute,
sui rams dai àrbui, cui siei ricams di lûs a incjante
e cuant che a cole, in une nuvule d'arint a sfante.
Al è un mont pûr, cjalt, morbit e lusorôs,
un biel mont lêgri e fiestôs.
5
A CORIN LIS STAGJÒNS
Lis cisilis son tornadis
la nature si dismôf
lis ‘zornadis son slungjadis
si cibichin i morôs.
Il soreli ben al tuche
son madûrs racòlz e fen
e la int a va in vacanze
par mantègnisi plui ben.
I burlàz cui lamps e tons
a rinfrescjn la regjon
e il bosc cui tancj colôrs
al salude la stagjon.
Il freit che ormai al crùzie
la nature al fâs polsâ
e la neif cul so candôr
ancje i cûrs a fâs cjantâ
6
D’INVIÈR DAL ZONCOLÀN
Il Zoncolàn e il so Tamai sùbit daûr
da Cjargne a son tal mièz a son tal cûr.
Plens di neif e di sorêli das Alpis a dan une splendide visiòn
das rossis Dolomitis as Cjargnelis e as Gjulìis fin tal Cjampòn.
Il Tajament e il lâc come slacare darint a si viodin vièrs la planure
lis Prealpis cuintri lûs a metin in biele mostre la lôr figure.
Si cognos ben la Mariane il Feste e il gros Verzegnis
il Tinisa il Cuel Gjentîl ma soredùt l’è lì l’Arvenis
In batude di sorêli in prin plan lis Pesarinis
cui Cretòns il Cret Forât il Cimòn e lis Fuinis.
Tal cîl a pichin là daûr lis altis monz come il Civete
il Pelmo cui toriòns e l’Antelao une piràmide di crete.
Su Sapade ben si viôt dal mont Fier la biele creste
e il Peralba chel grandon di ca dal Piave al reste.
Si continue cul Cjadenis e plui in là il Navagiùst
il gros grop dal Volàia sul so pas al rive iùst.
Lì di front al è il mont di Crostis lis e blanc ben neveât
daûr di lui i cretons dal Cogliàns che ti lassin senze flât.
Poc plui in là dilà da Bût il cretôs Piz di Tamau e la tonde Avostanis
il Cuestalte e il Lodin sul confin todesc a son monz benzà lontanis.
Ben si cjalin il Zermùle e il Tersàdie che a son a pôc plui di un svual
si viôt ancje la Crete d’Aip cul lunc e tont mont dal Cjaval.
Sul lontan confin cu la Slovenie al è il Mangart un gjgànt
il Sèrnio il Zuc dal Bor e il Jôf di Montàsio a son propit lì davant.
Il famôs Canin al siere il cercli di chest splendit biel creât
l’è massìz e plen di neif che al pâr di zucar ben cjamât.
7