Rimis e pensadinis in tumiezzin

LIS ARTS

Indice

  1. L'art
  2. La vere art
  3. Art tradizionâl 
  4. La critiche d'art
  5. L'artist
  6. Piturâ
  7. Scolpî il len
  8. Canzons îr e vuei
  9. Spetacul di danze
10. Scrivi
11. La cjacarade tumiezzine
12. La poesie
13. Versione scaricabile

1

L'ART

L'art a è una scorciatoe

che di colp

a fâs sintî, intuî, capî.

2

LA VERE ART

La vere opare d'art

a ducj a jà ce contâ;

stòris lungjs o curtis

a ogniun chê ch'al sà scoltâ.

3

ART TRADIZIONÂL O ESSENZIÂL

Ta l’art tradizionâl

la critiche a è contente

cuant che a cjate alc che a nol va.

ta l’art essenziâl,

a è contente cuant che a cjate

alc che al va,

tant che al ven di pensâ

che art cussì a è facile di fâ,

a baste la critiche che a la sa contâ.

4

LA CRITICHE D'ART

Complimenz a chê critiche d'art,

che da l'art strambe tant a rive a contâ;

pecjat che das oparis d'art,

tante int a rive a slontanâ.

5

L'ARTIST

L'artist non copie mai,

lui al sa viodi;

e dentri di se,

fregui di mont sintìi;

par ispirasi

e cui siei miez tornaiu a dìi.

6

PITURÂ

Tu viodis, tu vivis o tu rivivis un moment,

e a ti ven voe di fermâ, chê atmosfere, chê idê, chel sentiment.

Libar e di gust, su la tele blancje,

tu disegnis formis tu spalmis colôrs;

cun chê ghenghe che a ti ven da convinzion,

che al merite fâ vivi chel moment, chê emozion.

7

SCOLPÎ IL LEN

Une idê, un toc di len;

tu lu cjalis, tu lu tocjs, tu lu nasis,

e al è dentri di te;

e di te a ven fûr chê fuarze

che con sgoibiadis netis

chel len a và a scolpî;

e che al par content di cedi,

qualchi sissulute,

pur di cjapâ une forme,

un sentiment, une idê.

8

CANZÒNS ÎR E VÙEI

Lis canzòns a si cjantuzzavin

cun passion e cun morbi;

mentri vuei, sôl a si scoltin

inrabiâz e senze trop capî.

9

SPETACUL DI DANZE

Fantaz e fantazzinis tal biel lusôr

a son di musiche si movin lôr,

si movin lizêrs tai vestîz dai vîfs colôrs

a fasin figuris a son come flôrs.

Cun pas e pôsis mil emozions a fasi veî,

a movin dut cun armonie dai pîs as mans fin ai cjaveî.

Al è un biel viodi, un biel sintî

che dome il bal cu la sô mùsiche al pos dî.

10

SCRIVI

Scrivi parzè?

Scrivi par clarisi lis ideis,

a menz tegnîlis e ta vite confrontâlis,

par tegnîlis o cambiâlis.

11

LA CJACARADE TUMIEZZÌNE

Il tumiezzìn

al è prezzîs cuant che al criche

e sbrigatîf cuant che al zoncje;

ma al è cuant che

su pas vocâls a si ferme a polsâ,

che al cjâf a i dà il timp di pensâ.

12

 LA POESIE

A è vere poesie,

se a sa stizzâ la fantasie;

fin a rivâ a sorprendi

cul biel che a si sint dentri.

13